الحميدي في رثاء العلاّمة حمادة: "يا فلسفة ضبّي شموخك وارحلي"

الرئيسية ثقافة / Ecco Watan

الكاتب : محرر الصفحة

Sep 28 25|22:01PM :نشر بتاريخ

كتب الشاعر عصام الحميدي في رثاء العلاّمة شوقي حمادة في إيكو وطن:

شوقي حماده قلت يا منادي ؟
ما عرفت حالك شو عم تنادي؟
ما شعرت لحظه برجفة المذياع
وبغيمة السودا على بلادي؟؟
شوقي حماده مش خبر ينذاع 
هالاسم هالة نور وزياده 
علم وثقافه ومعرفه وابداع
ما في ولا كاتب زاد قيمه وعز 
ان ما كان منو آخذ  شهاده

قنعنا يا ربي بنعمة الصبر الجميل
انت الخبير بحالنا وانت الوكيل
من حكمتك وديّت إلنا كتاب دين 
وآمن  سلفنا  بالقبيل  وبالرحيل
مش هيك يا استاذنا الحر الأمين؟
المفضل على الاجيال مدري كم جيل 
كنّا بصفوفك هيك نحنا معلّمين 
نشعر بصدرك قلب اصفى من الدموع
ونقرأ بوجهك  حكمة الشيخ الجليل 

شوقي حماده واحترامي للّقب
يا جامعة اخلاق يا كتاب الأدب 
يا ركن صلب بصروح  الفلسفه
يا معجم الألفاظ نجمك ما غرب
البيكون متلك ما  بظن  بينطفي 
يا مارد المنسوب من أعرق نسب
يا  ازهري يا عبقري يا معرفه
بكرا عيون العِلم رح تبرم عليك 
تا تشوف شوقي وين راح وشو كتب..

يا فلسفه ضبّي شموخك ورحلي 
بغياب شوقي اليوم لازم تخجلي 
وان كان بدك ترجعي لا ترجعي 
إلا  بعمالقة   الزمان    الاولي
شوقي حماده كان مكتبة الوعي
قديش بدك  يا  ثقافه  تزعلي 
مات البحبو الكان فكرو مرجعي
تا نقسم الأحزان مش صعبه كتير
لبنان ياخذ نص ، والباقي إلي... 
 
يا  ريتني ما وقفت  تا  ارثيك
تمنيت اوقف  يوم   تكريمك
باجمل قصيدة شعر تا غنّيك
من شعرك الصافي وتعاليمك 
ياما سألنا  الرب تا يخليك
وتضل منهل عِلم  ويديمك 
لو كان قلنا الحبر رح يوفيك
بتدخل عا جنّة ربنا  مرتاح
وعا جناحها الكلمات بتقيمك....

نيال سطر اللي انقرا بعينيك
نيال  فكره بخاطرك  جالت 
نيال ورقه  لامست  ايديك
نيال   كلمه   منك  انقالت
يا معجم الألفاظ اسمك هيك
يا  مكتبه ما بعمرها  تغالت
يا نعمة الوقت اللي مر عليك 
حتى الوقت كان يربح وجودك 
اللحظه  بوجودك  عزها  نالت...

يا بدر صعبه ينطفي شعاعك 
النور الحلو بسطور ابداعك 
حامل براسك نص عِلم الكون
ما بظن  انو  القبر   بيساعك

بعقلين يا بلاد الثقافه والوحي 
مات الحبيب الكان بمعزّة ابي
يا ريت يا بعقلين فيكي تسمحي
تا إنقل الجثمان عا بيتي الفقير
يا يصير في بالبيت عندي مكتبه

يا معلمي يا ريت كنت بتنفدى 
بفديك بسنيني على طول المدى 
ما احترت عزّي مين فبل ومين بعد
عزّيت  شِعرك قبل ما عزّي حدى

رحمك الله